Die voormalige Congress of the People-leier en bevrydingstryd-ikoon Mosiuoa “Terror” Lekota is in die ouderdom van 77 oorlede.
Dean Vivier/Netwerk24/Gallo Images
Voormalige Congress of the People (Cope)-leier en bevrydingstryd-ikoon Mosiuoa “Terror” Lekota is in die ouderdom van 77 oorlede.
Lekota, wat verlede jaar uit die politiek weggestap het, het met sy gesondheid gesukkel.
Teboho Loate, Cope-leier, het in ‘n verklaring gesê Lekota is Woensdag vroeg dood, “na ‘n tydperk van siekte”.
“Die Lekota-familie het privaatheid versoek gedurende hierdie moeilike tyd, en die party vra die publiek en media om hul wense te respekteer. Die party sal gereelde mediaverklarings uitreik om die nasie oor verwikkelinge in te lig,” het Loate gesê.
Hy het bygevoeg dat besonderhede van gedenkreëlings en huldeblyke gekommunikeer sal word.
“Namens die leierskap, lidmaatskap en ondersteuners van Cope, betuig ons ons innige meegevoel met die Lekota-familie en alle Suid-Afrikaners wat oor hierdie verlies treur,” het hy gesê.
Lekota, ‘n voormalige Robbeneilander, het ‘n sleutelrol gespeel in die vorming van die United Democratic Front.
Hy was tussen 2002 en 2007 ’n ANC-voorsitter onder Thabo Mbeki, maar het die party met afsku verlaat ná die opkoms van Jacob Zuma.
Hy het Cope in 2008 gestig. Die party het kort belofte getoon, maar het daarna verwelk.
