Dean Macpherson, DA KZN-leier, het gesê die party se vergadering met die NFP was “hartlik en leersaam” en ‘n positiewe stap om die provinsiale koalisieregering ongeskonde te hou.
Phando Jikelo/RSA Parlement
- Die DA het met die NFP vergader om kommer aan te spreek ná die NFP se onttrekking aan KZN se koalisieregering.
- Die NFP het vroeër vandeesmaand onttrek.
- Die DA beplan ’n veelpartyvergadering met die IVP en ANC om verskille op te los en die koalisie te stabiliseer.
Die DA in KwaZulu-Natal meen die party se bilaterale vergadering met die Nasionale Vryheidsparty (NFP) Saterdag was “’n positiewe stap in die regte rigting” om die provinsiale koalisieregering ongeskonde te hou.
Die NFP het vroeër vandeesmaand aangekondig dat hy hom aan die regerende koalisie onttrek het omdat sy vennote nie ooreenkomste nakom nie.
Verskeie partye in die provinsiale wetgewer wou daarna met die NFP vergader, insluitend die DA.
Dié vergadering het Saterdag meer as twee uur geduur en volgens Dean Macpherson, DA-provinsiale voorsitter, was dit “hartlik en leersaam”.
“Die DA het die geleentheid verwelkom om direk van die NFP te hoor oor hul bekommernisse sowel as hul verwagtinge om gesprekke oor die toekoms van die GPU (regering van provinsiale eenheid) te hervat,” het Macpherson gesê.
Hy het gesê die DA sal die IVP en ANC – ander lede van die regerende koalisie – na ‘n veelpartyvergadering nooi “om alle partye toe te laat om kwessies wat vir hulle belangrik is, te opper en uitstaande verskille op te los”.
LEES | Koalisiekrisis in KZN: DA soek dringend gehoor by NFP
“Ons siening bly dat die GPU, met die volle deelname van die NFP, die beste voertuig is om stabiliteit, ekonomiese groei en werk aan die mense van KwaZulu-Natal te lewer.
“Die DA glo dat vandag se vergadering met die NFP ’n positiewe stap in die regte rigting was en doen nou ’n beroep op alle politieke partye in die GPU om saam te kom in die beste belang van die provinsie.”
Terwyl die NFP net een setel in die KwaZulu-Natalse wetgewer met 80 setels beklee, is dit deurslaggewend, aangesien die MKP en EFF aan die een kant onderskeidelik 37 en twee setels besit, en die IVP 15, die ANC 14 en die DA 11.
